我見到兩小花咋

當天整個城市那樣輕快，沿路一起走過長街，又到7.1，唔使約定，八方都知道大家今日維園見。今年警方陰招打壓遊行，唔畀遊行人士製造噪音，又唔准行得慢，咁好難搞喎，須知道遊行路線沿途有好多民間團體、政黨擺街站，遊行人士行埋去睇下、捐錢好正常，遊行又唔係競步，點解要滾水淥腳？
周澄幫忙嗌咪
講開擺街站，八方聽聞各政黨今年都搞搞新意思，派出新面孔在街站嗌咪為遊行人士打氣，社民連陽剛氣重，以前有毓民嗌到青筋現，家陣由長毛撐住大局，今年終於有新人上陣，唔講都唔知，原來社民連有個婦女部，組織、動員女黨員搞社運。
呢個婦女部今日出動，據講會派出多個女將街站嗌咪，其中一個係有社民連「柏芝」之稱既林采薇，佢入黨都好一段日子，頗為活躍黨務，係集會遊行中堅分子，有佢站台嗌咪，相信有一定號召力。另一位登場既係La La林詠妍，佢曾經幫陳太同公民黨助選，之前係公民黨員，個幾月前轉投社民連。
La La同八方講，由於政治立場同公民黨唔同，所以轉黨，「佢地好似好中產，其實冇乜方向，社民連幫助基層既綱領好清晰」。La La今年教院畢業，本來去做幼稚園老師，但o依家另有打算，因為決心從政，打算今年參選區議會，年僅23歲既La La，意志好堅定。唔係黨員既周澄，據講今日都會幫忙嗌咪。
明年路線變短
03年7.1大遊行至今，由維園行去中環政府總部，相信已成為唔少人集體回憶，今年遊行到中環政府總部應該係絕唱，因為添馬艦新政府總部出年入伙，明年7.1遊行以添馬艦為終點既話，路線會短左，想留個回憶，今年係最後機會。